ساری کؤینک

گتیر ساری کؤینه ییمی.

چیخارداق اینیمیزی.

و پاییزیلیق اولسون دئییه،

                      سوواراق ساریلیق دردینه ایچیمیزی.

من کی پریشان یاری آت یاری آدام دئییلم.

من پریشان اوغلان اوشاغییام.

                         اومسوق ....

آردی

بلكه ده بير قادين سيزاجاق دي؛

                                    بو مصراع دان سونراني دئييرم.

و  اونون عطيرلري اوستو باشي اولاجاق دي.

يئنه بوندان سونراني دئييرم.

 منده ايزي گؤرونه جك دي

بلكه ده بير آزدان نه سه بير شئي،

شئي يوخسا دا،

                 بير سؤزجوك اولاجاق دي بو شعرده.

سونراسي قيامت اولابيلر...

آردی

قیرمیزی

او سولچو دئییل دی.

قیرمیزی نی سئویردیسه.

او اصلینده سئومه یی باجاریردی تکجه.

و ده فیرچاسیندا بویلو اولدوغو جیزیق لاری.

قیرمیزی جیزیق لاری دئییرم.

 

باهار اونون ائوینده چیچکلی دئییل دی.

قارا قامچیل قیز بدن ایدی

               دلی جه سینه اؤپوش سونراسی.

و باشیندا اکیلمیشدی پاییز

                         همشه باهار کیمی.

او ساغ چی دا دئییل دی.

لاپ دوزونه دورساق،

              او ساغ دئییل دی هئچ

هر گون یازی ماساسیندا اوتوروب،

چایی سویوقدان سونرا ایچردی.

سو دادلی ایدی رسیم لری

آنجاق هر شئی اودلو ایدی اوندا.

لاپ او قیرمیزی جیزیق لاردا.

-          خانیم نه دیر سیزده بو قیرمیزی ائحتیراص؟

-          هاوالارین سویوخ کئچمه سی دیر بلکه.

                                    بلکه ده رسم اثرلریمده بیر کیشی نین یوخلوغوندان ایرلی گلیر.

گلیر!  

     گلیر دئییه دوشونوردو او

کؤهنه و باریتلی بیر گلیش یوخ

تزه

اردبیلین تزه مئیدانیندان گلن بیر هارایی دئییردی بلکه!؟

-          آی بولغاواردیر گیلاس

           آی بوردا واردی گیلاس

گی

   گی

        لاس لی قیز.

 

- عؤمرومون هاراسیندان باشلاندین آخی سن؟

ائله کی یوخویا قالدیم

و اولدوزلاریم  اؤزوم بیلمه دن سانجاقلاندی اته یینه.

 گؤزو قانلی اولدوزلاریمی دئییرم،

                          ائشیدیرسن می؟

سونرا بیزده توی اولاجاق دی

و دوستلاریم توتوملو شراب سوزه جک دیلر قارشیمیزدا

شعرلی و رسیم لی حیات ساغلیغینا،

وور ها وور دوشه جک دی رقص قوللاریندا

تره کمه، هئیوا گولو چالیناجاق دی تپیک لرده.

آی خیاو شاعیرینین لولو قنبر گؤزوندن ایراق.

سئویرمیسن بو حالی؟

بیرده موغانلی شاعیرلرین شعریندن اوزاق.

اوزاق گزمه لی دئییل دین آخی سن!!

سنی هانسی یؤنده ایتیردیم ائی اللری گیلاسلی قیرمیزی قیز؟

تویوموزدا شاباشینی گؤزله ییرم،

یوخودا گلسن بئله.

گبیب ده اردبیلین تزه مئیدانیندا های سالیب اوخوسان بئله.

آی آلمادی هئیوادی

آی آلمادان قالمادی

قیرمیزی گیلاس واریم

آی سبدده قالمادی.

داش ایدی بیر بارداق سو.

سویوق ایدی،

لئی

لئی

لئی لا خانیمین ائوی.

گلین لییی ایران خالچاسیلا آپاریلمیشدی.

سونرا

بیر قیلینج ایدی،

      بیرده کیشی سینده گونو هوه سی،

حو

حو

حو

سندن دیریلیک ایسته ییر گلنیمیز آ کیشی!

سو سینیق بارداق دا قالاسی دئییل.

بوراخ

فیر

فیر

فیر

آت ایندان اودوزدوغون تیرمه بدنی.

دوداغلارین چارتلاق گؤینه لتیسی بیر یانا،

گونو،

گونده باشیندا اولاییر بو خانیمین.

لئی

لئی

لئی لیم وای.

سو ایدی،

بیرده بارداقدا ایتیرلمیش عصمت.

عرب دن دانیشیریق

قیامت قوپور قادینلیقدا.

من بو ساچلاری سئومیشدیم

قولاج قوخولو

                 انکیر منکیری.

                           قبیر عذابیم.

ایندی سه،

            دور گئده ک.

منده قبیر بیر فاتیحه لیک دئییل.

و شراب ایچمه منی

نه دنی قالسین قیامته.

بورادا کؤک دن دوشودو ماهنی لار.

کور دیلنچی نین پارا ایستک لرینی اوخشادی بو ساز.

و باشی کسیک لئش قوخوسوندا باشیم آغریدی.

او زامان،

          دیلده توپوق چالیر بیزیمکی

و گون باتاندان باشلانیر حیات.

آخ خان نه نه!

آتالیق قوخوسو گلمیر مندن.

بو دا باشیم اوستونده سون دوعالارین.

ایلین سون چرشنبه سینده آداخلی ایدیق اونونلا

اود اوستونده قالدی هر نه واریمیز.

سونرا دوشوندوک

                      هله قیش دان بیر ایکی چرک قالیر.

سن دئمه باهارمیش آخ خ خ!!!!

باییر،

بوزوشموش آداملارین جیزگی لرینده دولاشیردی.

قار

      قار

        یاغیردی قارغالاردان

دور گئدک قادان آلیم،

من دوزو بوگون پیس اولموشام.

و صاباحا یاخچی اوغلانلیغیم قالماییب.

پاییز آخشامی.؛

دون وورموش

               تورپاق بازاری.

منده وطن شعری یازیلمیر آرتیق.

تن بؤلونور گؤوده م .

بیر آز اویانلیق

اویانمایاجاق هاوامیزدا نه ایچیمیز

                            نه ده توتون یارپاقلاری.

دئمه لی توتونسوزام

                و ده توتومسوز.

ائشمه لریم بوم بوشلوغوندا سیزاقلانیر.   

دوشونورم اؤلومه واخت قورتاریر آرتیق.

دوورادا هر کس.

دوواردا سن؛

         اوخویورسان منی

                 سون قاپی دان یولا سالیرسان

سو اووجوندادیر

و یولون اوتاییندان یاغیشی یاغیرسان

                                           داش دوشه مه لره.

شهر ایسلاق

شهر شراب رنگینده

                   ساغلیق سیز.

گره ک سیزله شیرم کولگه کیمی.

اومودوم گؤزومه باخار قالیر بو آخشام.

و  

چا

پ

قین سیز اولدو سؤزجوک لریم دئییه

                                      سندن کئچیرم.

 وسنه سونورام سون ائحتیراص لاریمی.

لوت لومبه.

بویور ایچه ری.

باغیشلا کی

       پاییز دی منده ائو

و سن اؤلمه لی سن منده عزیزیم.  

 

 

 

قورخورام بو سون قراریمدان

و بئینمیده

            کؤهنه آلما کیمی قوخویان آتلاغ پودلاخ سؤزلردن.

 

بلکه سونلوق

 صاندیقچادا گیزلتدییم بیر تیکه کاغاذ اولاجاق   

بلکه ده نه بیلیم نه ...

 

آردی

سئوگی

بایاق اللریم اللرینده ایدی

بیلیمرم بلکه ده هاوا توتقون ایدی

                                  بلکه ده یوخ.

هر حالدا بایاق ایدی.

بیرده کی زامانین نه فرقی آخی

داها ایندی اللر یوخ

و هاوادا دایانییب 

بو بیر آز هاواسینی ایتیرمیش

                                   آنامین ایفاده سی دیر.

 

لاپ ایندیجه

سایدان دوشدو هر شئی.

داها اؤنملی دئییل چؤره ک.

ائوی اوغرو دا آپارا بیلر.

آردی